அரசு பணியாளர் தேர்வாணைய தேர்வு முடிவுகளை விரைவில் வெளியிட நடவடிக்கை எடுத்திருப்பதாக தெரிவிக்கப்பட்டுள்ளது. இதுகுறித்து தமிழ்நாடு அரசு பணியாளர் தேர்வாணையம் வெளியிட்டுள்ள செய்திகுறிப்பில் கூறியிருப்பதாவது:- விரைவில் தேர்வு முடிவு தமிழ்நாடு அரசு பணியாளர் தேர்வாணையத்தால் நடத்தப்பட்ட பல்வேறு போட்டித் தேர்வுகளுக்கான முடிவுகளை படிப்படியாக விரைவில் வெளியிட தேர்வாணையம் நடவடிக்கை எடுத்துவருகிறது. அதன்படி, 2016 மற்றும் 2017-ம் ஆண்டுகளில் நடத்தப்பட்ட தேர்வுகளில் நிலுவையிலுள்ள முடிவுகளை வெளியிடும் தோராய காலஅட்டவணையை இணையதளத்தில் ( www.tnpsc.gov.in ) வெளியிட்டுள்ளது. 2018-ம் ஆண்டில் வெளியிடப்பட்ட அறிவிக்கைகளுக்கான தேர்வு முடிவுகள் வெளியிடப்படும் தேதி அவ்வப்போது தெரிவிக்கப்படும். இவ்வாறு அதில் குறிப்பிடப்பட்டுள்ளது. தமிழ்நாடு அரசு பணியாளர் இணையதளத்தில் உள்ள முக்கிய குறிப்புகள் வருமாறு:- குரூப்-4 முடிவு 9,351 பணியிடங்களுக்கு கடந்த பிப்ரவரி மாதம் 11-ந்தேதி நடத்தப்பட்ட குரூப்-4 தேர்வு முடிவு ஜூலை மாதம் கடைசி வாரம் வெளியிடப்படும் என்றும், கடந்த அக்டோபர் மாதம் 13-ந்தேதி முதல் 15-ந்தேதி வரை நடத்தப்பட்ட 85 பணிகளுக்கான குரூப்-1 மெயின் தேர்வு முடிவு செப்டம்பர் மாதம் கடைசி வாரம் வெளியிடப்படும் என்றும் உத்தேசிக்கப்பட்டுள்ளது. இவ்வாறு அதில் கூறப்பட்டுள்ளது. CLICK
