கருணை அடிப்படையில் பணி வழங்குவது தொடர்பாக திருமணமான பெண்ணுக்கு காலவரையறை நிர்ணயித்து தமிழக அரசு பிறப்பித்தஆணையை ரத்து செய்து சென்னை உயர்நீதிமன்றம் உத்தரவிட்டுள்ளது.
எனது தந்தையின் பெயர் எஸ்.பரமசிவம். கடந்த 1980-ஆம்ஆண்டு செப்டம்பர் மாதம் 15-ஆம் தேதி தமிழக அரசின் வருவாய்த் துறையில் பணியில் சேர்ந்தார். இதைத் தொடர்ந்து அவர் கிராம உதவியாளராக பதவி உயர்த்தப்பட்டார். அவர்பணியில் இருக்கும் போது ராஜேந்திரன் என்பவருடன் எனக்கு திருமணம் நடந்தது. இந்த நிலையில் பணியில் இருக்கும் போது, நெஞ்சு வலியால்கடந்த 2008-ஆம் ஆண்டு எனது தந்தை இறந்தார். இதையடுத்து அதே ஆண்டுஜூலை மாதம் 7-ஆம்தேதி கருணை அடிப்படையில் வேலை வழங்குமாறு அரியலூர் மாவட்ட ஆட்சியரிடம் வேண்டுகோள் விடுத்தேன். எனக்கு திருமணம் ஆனதால் கருணை அடிப்படையில் பணி வழங்க முடியாது என 2013-ஆம்ஆண்டு அக்டோபர் மாதம் 3-ஆம் தேதி எனது விண்ணப்பத்தை நிராகரித்தார். 2012-ஆம் ஆண்டு அரசு பிறப்பித்த ஆணையின் அடிப்படையில் எனது வேண்டுகோளை நிராகரித்ததாக அந்தப் பதிலில் தெரிவிக்கப்பட்டது. எனவே, அந்த அரசாணையை ரத்து செய்து விட்டு, கருணை அடிப்படையில் எனக்கு வேலை வழங்க உத்தரவிட வேண்டும் என மனுவில் கோரப்பட்டது. இந்த மனு மீதான விசாரணை நீதிபதி எஸ்.வைத்தியநாதன் முன்பு நடந்தது.விசாரணையின் போது மனுதாரர் தரப்பில் வழக்குரைஞர் மயிலை சத்யா ஆஜரானார். அப்போது, அரசு தரப்பில் அரியலூர் மாவட்டம் ஜெயங்கொண்டம் தாலுகா தாசில்தார் பதில் மனு தாக்கல் செய்தார். அதில், மனுதாரரின் தந்தை இறப்பதற்கு முன்பு அவர் திருமணம் செய்து கொண்டார்.
மனுதாரர் அவரது கணவர் குறித்து எந்தத் தகவலும் அளிக்கவில்லை. 2001-ஆம் ஆண்டு நவம்பர் மாதம் 29-ஆம் தேதிக்கு முன்பு திருமணம் முடிந்த பெண்கள் கருணை அடிப்படையில் வேலை பெறுவதற்கு தகுதி இல்லாதவர்கள் என 2012-ஆம் ஆண்டு ஜூன் மாதம் 18-ஆம் தேதி தமிழக அரசு பிறப்பித்த அரசாணையில் தெரிவிக்கப்பட்டுள்ளது. இந்த வழக்கில் மனுதாரர், எஸ்.ராஜேந்திரன் என்பவரை 2001-ஆம் ஆண்டு ஜூலை மாதம் 12-ஆம் தேதி அவரது தந்தை இறப்பதற்கு முன்பே திருமணம் செய்து கொண்டார். இதனடிப்படையில் மனுதாரர் கருணை அடிப்படையில் வேலை பெறுவதற்கு உரிமை வழங்க முடியாது. இந்த காலவரையறையை நிர்ணயித்ததில் எந்த தவறும் இல்லை என அதில் தெரிவிக்கப்பட்டது.
விசாரணைக்குப் பிறகு நீதிபதி பிறப்பித்த உத்தரவு: ஆணுக்கும் பெண்ணுக்கும் எந்தப் பாகுபாடும் இருக்கக் கூடாது. இருவரையும் ஒன்றாகத்தான் கருத வேண்டும். கருணை அடிப்படையில் வேலை வழங்குவது தொடர்பாக பெண்ணுக்கு எந்தக் காலவரையறையும் நிர்ணயிக்க முடியாது. அதனால், 2012-ஆம் ஆண்டு ஜூன் மாதம் 18-ஆம் தேதி பிறப்பித்த அரசாணை சட்டவிரோதமானது. அந்த ஆணை ரத்து செய்யப்படுகிறது. எனவே, மனுதாரரின் வேண்டுகோளை பரிசீலனை செய்து மூன்று மாதங்களுக்குள் கருணை அடிப்படையில் வேலை வழங்க வேண்டும் என உத்தரவில் தெரிவிக்கப்பட்டுள்ளது.
